MaternidadEmbarazo

Amak dira erditzean protagonistak

 

Erditze bat ikusi dutenek inoiz gertatu zaien gauzarik ederrena eta ahaztezinena izan dela diote. Egunero horretan lan egin arren, iritzi bera du Charo Fernandezek, Donostia Ospitaleko emaginen buruak: ┬źOso lanbide ederra da emaginarena. Gainera, erditze bakoitza erronka bat da guretzat┬╗. Nabari zaio gustura ari dela lanean. Jaioberriek duten bizitasunarekin mintzo da bere ogibideaz.

1978an amaitu zituen emagin ikasketak Fernandezek. 27 urte daramatza horretan lanean, horietatik 14 Donostia Ospitalean. Oraindik gogoan du nolakoa izan zen utzi zioten lehen erditzea: ┬źErrazagoa izango zela pentsatuz, hilik zegoen fetu baten erditzean parte hartzea agindu zidaten. Oso tristea izan zen; ez dut sekula ahaztuko. Hori da gure lanbidearen alderik gogorrena┬╗.

Zorionez, gaur egun nabarmen gutxitu dira halako kasuak: ┬źEmakumea, haurdun geratzen denetik umea izan arte, oso kontrolatua dago. Horri esker, arazo ugari saihesten dira. Garai batean, asko eta asko erditzera baino ez ziren etortzen erietxera. Orduan egiten zitzaizkien diagnostiko guztiak: fetua nola zegoen, nola kokatua zegoen, handia edo txikia zen...┬╗.

Egun, aldez aurretik egiten zaizkien proba guztiez gain, erditzera iristen direnetik, jarraipen zorrotza egiten zaie: ┬źKontrol gela bat dugu, eta handik, dilatatzen ari diren sei emakume kontrolatzeko aukera dugu, telebista bidez. Gainera, txosten ugari ekartzen dituzte┬╗. Halaber, jaio bezain laster, gela berezi batera eramaten dute haurra. Han, osasun azterketa zabala egiten zaio: ┬źErietxe askotan, gela hori kendu egin dute, baina guretzat oso garrantzitsua da. Dena den, helburua haurra eta ama ahalik eta denbora gutxiena banatzea da. Horrek asko laguntzen du edoskitzean┬╗.

Emakumeen zorroztasunak bultzatuta, beste hamaika berritasun eta aurrerakuntza izan da emaginen lanbidean. Esanguratsuenetakoa anestesia epiduralaren erabilera izan da, Fernandezen ustez: ┬źErditu aurretik izaten diren uzkurduren ondorioz mina izango duten arren, ondoren anestesia jarriko dietela jakiteak asko lasaitzen ditu. Ez dira hain beldurtuak etortzen. Duten kezka bakarra ondo aterako ote den izaten da┬╗.

Bestalde, emakumeen prestakuntza hobea da: ┬źHaurdunaldiari eta erditzeari buruzko liburu eta aldizkari ugari irakurtzen dituzte. Gainera, guk ere erditzerako prestatzeko eskolak ematen ditugu. Asko dakite, amek. Horrek asko erraztu du emaginaren eta amaren arteko komunikazioa. Den den, profesionalak ez, haiek dira erditzean protagonistak┬╗. Emaginek ere asko ikasi behar izan dute: ┬źEtengabe ari gara prestatzen, bai praktikoki, eta baitateorikoki ere. Izan ere, hau ez da ofizio bat, lanbide bat baizik┬╗. Horri esker, emagina gai da erditzean bakarrik egoteko: ┬źGerta daiteke gela guztiak beteta egotea eta bakarrik moldatu behar izatea. Dena den, ohikoena laguntzaileren bat izatea da┬╗. 12 erditze inguru izaten dira egunean Donostia Ospitalean, eta horietan laguntzeko 30 emagin: ┬źKopuru polita da, baina orain gutxi arte gabeziak izan ditugu. Izan ere, espezialitatea kendu zuten urte batzuetan. Beraz, zaila zen emaginak topatzea┬╗. Gainera, immigrazioari esker, jaiotze tasa handituz doa, eta lan mordoa izan dute: ┬źEtorkizuneko lanbidea dela esan daiteke┬╗.

ARGITU GABEKO GAUZAK. Aurrerakuntzak eta berritasunak izan arren, oraindik ez dakite zergatik gertatzen den erditzea: ┬źBadakigu amak uzkurdurak dituela, eta mingarriak direla; baina ez zergatik gertatzen diren. Hori dela eta, ez diegu zehazki esaten haurra noiz jaioko den┬╗. Bestalde, ez dute lortu uzkurdurek sortzen duen min hori arintzea: ┬źAnestesia jarri aurretik pasatu beharreko gauza da. Hori igaro arte ezin dugu ezer egin. Agian, etorkizunari begira lortuko dugu hain mingarria ez izatea. Baina, oraingoz, zail ikusten dut┬╗. Denbora hori, gainera, ez da beti bera izaten. Hori bai, egun bat baino gehiago ezin da luzatu. Bestela, erditzea behartzen dute. Umeak edo amak arazoren bat izanez gero, berriz, zesarea egiten diote amari: ┬źAzkenaldian zesarea kopurua jaistea lortu dugu, eta oso pozik gaude. Amentzat askoz hobea da hori. Azkarrago osatzen dira┬╗.

Duten beste erronketako bat aurreratzen diren erditze kopurua murriztea da: ┬źOraingoz, ez dugu lortu kopuru hori murriztea┬╗. Emakumeek duten bizimoduak zerikusia du horretan: ┬źGehienek lan egiten dute, eta pixkanaka gero eta kargu garrantzitsuagoak dituzte. Horietan presioa handia izaten da, eta horrek ez du askorik laguntzen┬╗. Halaber, garai batean askoz babestuago zeuden: ┬źBikotekidearen laguntza dute batez ere. Horretan urrats handiak egin dira. Gaur egun aita gehienak egoten dira erditzeko orduan┬╗.

Beste aldaketa esanguratsua edoskitzea izan da. Izan ere, ama gehienek bularra ematen diete umeei. Beste esparruetan bezala, gauzak aldatuz doaz horretan ere.

 

AINARA ARRATIBEL – Donostia

2006-05-12

http://www.berria.info/testua_ikusi.php?saila=plaza&data=2006-05-12&orria=056&kont=007


Publicaciones relacionadas

Deja una respuesta

Este sitio usa Akismet para reducir el spam. Aprende c├│mo se procesan los datos de tus comentarios.

Bot├│n volver arriba